قصة من عدن : طفشونا بالشاهي


الثلاثاء 11 يونيو 2019 10:05 صباحاً

كتب :خالد محمد شمسان

 

روحت اليوم وانا حالتي حاله البيت حليت الشميز والجرم والمشدة وقلت للحرمة : صبنيهم بسرعة قبل ماينشف الشاهي وبعدين يصعب تنظيفهم..

 

قالت : او..او انت ومن تضاربت وطفشك بالشاهي وجعثك جعث من صبح الله قد قلت لك بطل الطبازة حقك والمعقلة انت شيبة مش حق مضرابه..

 

رديت عليها : اسكتي مالك دخل انا عادنا عونطي ولا اكبر كبير يقدر يحرك صبع في رجلي..

صبني الثياب بسرعة..

 

قالت : ليش تهنجم فوقي روح هنجم فوق اللي ضربك وطفشك بالشاهي..

 

قلت لها : خلاص لاتصبني خليهم انا بااخدهم للدوبي يغسلهم..

 

ردت : عادي اني بااصبنهم طيب بس قول لي ايش استوى؟

 

قلت لها : اللي حصل نزلت من المسجد بعد ان صليت الفجر وجلسنا ناكل خمير وشاهي زي كل يوم وكان جنبي على الطاولة الحاج سالم يناجم السيد صالح ابو الدجاج على الشرعية والانتقالي والغلاء وبعدين المناجمة تحولت الى شتم وتحدي وكان الحاج سالم يوقف يشتي يخرج يضارب ونحنا نمسكه والسيد صالح يصيح من مكانه والناس يمنعوه من المجئ الى طاولتنا..

المهم زاد الهيجان والشتم والتحدي ولادريت الا وقلص شاهي يطير في الهواء وحط على ثيابي بعد ان اخطأ السيد صالح في التسديد لان نظارتة آخر مقاس ونظرة ضعيف..

 

تدخل الناس واخدوا الحاج سالم معهم الى ركن الشارع لانه كان يشتي يرد الضربة ويرسل قلص شاهي مليان باتجاه السيد صالح ومنعوه واخدوه بعيدا وهو شيبه يمشي على عصى بصعوبة يعني انا اصغرهم لاننا في السبعين من عمري (زغير يعني) وكنت انا المتضرر الوحيد في معركة حامية بين اثنين شيوبة مخرفين هيا افتهملك الموضوع..

 

قالت : انتم جننتم ياشيوبة تخرجوا من فجر الله من المسجد تتضاربوا..

هيا انتبه على نفسك وصلي وروح ساني البيت المرة الثانية بايجيبوك مكسر ولااحد باينفعك  هات الثياب بااصبنهم يارامبو..

 

قهرتنا هذي الحرمة..

بس كمان صحيح انا ايش دخلنا بين هاذولا الشيوبة المخرفين..!!

 

كلاكيت ثاني مرة.. صالحونا بحبة دجاج

 

صليت الفجر اليوم وقررت اروح البيت ساني مش علشان انفذ تعليمات الحرمة.. لا ..

بس لاننا قررت انام قليل لاننا معي فحوصات لابد من عملها الساعة عشرة صباحا..

 

وانا تحت العمارة لفت الا والسيد صالح امامي هو وابنه يرحب بي قائلا : اهلا بأخي خالد الطيب سامحنا انا فدالك يابن شمسان قالوا الشاهي اجا فوقك قلت له : قالوا ياصالح باقي القلص ماوصل رأسي لو وصل فاتنا في الانعاش من بعدكم..

قال : والله زعلت عليك وامانتك تسامحنا قد الحاج سالم اجانا البيت أمس واتسامحنا واتغدينا سوى شيطان دخل بيننا..

 

صحت : الله..الله سديتم واتغديتم ماشاء الله وانتم ولافيبكم حاجة هيا خلاص اتوكل والمقهاية بطلت اجلس فيها..

 

ابنه ضحك وقال : ياعم خالد قد الوالد من امس وهو زعلان عليك وكان يشتي يجي لك قلنا الصباح احسن وانت تعرفه نظره ركيك..

قلت : نظره ركيك هاها..ذا قناص رهيب قنصنا بالشاهي ووسخ ثيابي وحرقنا ..

قال السيد صالح : خلي قلبك ابيض قدك انت ملح الجلسة وتعال نشرب شاهي ومالك من عاره الحاج سالم مناجم ولسانه طويل والشميز والمشدة حق العيد الكبير على حسابي وحبه دجاج من المحل بايجيبها لك فؤاد ابني للبيت اليوم..

هيا امشي معي نشرب شاهي ونأكل حبيتن خمير ..

قلت : والله انا سامحتك في نفس اللحظة ويعلم الله هذا لكن انت بطل القنفزة ورمي القلاصات فوق الناس ضحك وقال : بطلت الكلام في السياسة نهائيا..

 

رحنا المقهى الا وسالم جالس على الطاوله قلت له : رجاء ياسالم اجلس سكته خلينا نشرب شاهي وبطل المناجمة..قال وهو يضحك : مله فهم صاحبك يبطل السياسة..قفز صالح وقال : شوف مكانه كلامك يقبص تشتينا نعمل زي امس..

قفزت وقلت : باتعقلوا والا بااعرعر لكم الاثنين وبااسيب المقهاية لكم وللجن ضحكا الاثنان وقال سالم : ياعاقل نمزح معك

 

شربت الشاهي مع فتوات الشيخ عثمان وغادرت واثناء مغادرتي صاح السيد صالح ابو الدجاج : خلاص زي مااتفقنا بايجيك فؤاد بعدين مع الموضوع..

فهمت ان المقصود هو الدجاجة..

 

دخلت البيت نافش ريشي تقول ديك شركسي وقلت للحرمة : رامبو كسب دجاجة اليوم وشميز ومشدة في العيد من السيد صالح على الطفشه حق امس قالت وهي تضحك : متى حصل هذا ؟

قلت : الان في المقهاية ردت بسرعة :

على كذا خليهم يطفشوك كل يوم واني ماعزك بااصبن لك مادام فيها ثياب ودجاج..

 

شفتوا كيف الحريم كلهم اصحاب مصالح تشتينا اطفش بالشاهي يوميا علشان دجاجة..!!

http://adengd.net/news/390107/
جميع الحقوق محفوظة عدن الغد © {year}