مؤسسة عدن الغد للإعلام | من نحن | هيئة التحرير | اتصل بنا | ارسل خبر | نسخة الموبايل | نسخة القديمة | آخر تحديث للموقع الخميس 02 أبريل 2020 04:43 صباحاً

ncc   

عناوين اليوم
آراء واتجاهات
الأربعاء 25 يناير 2012 11:33 صباحاً

كل يوم خُبارة ..من سبق لحق !!

 خاص لـ"عدن الغد"

نادية شجن : أص .. أصه .. سكته .. يجعلك الصناج بأذونك ياللي صورتني .. منو دا اللي يدقدق تحت بيتي؟

 عبدالقوي : أنا يا خالة نادية.. لا تخافيش..

نادية شجن : هو إنتا يا عبدالقوي .. وأني اللي أحسب القاعدة دخلو عدن وقدهم يبنو متارس تحت بيتي..

عبدالقوي : فيبيك طافة للكاعة يا خالة نادية .. و أنا فوق راسي شغل الدنيا والآخرة..

نادية شجن : عجلو بآخرتك لا هو صدق .. أيش معك تحفر تحت بيتي يا عبد القوي؟؟

عبدالقوي : جالس أسوّر لي بقعة .. ما فيش وقت يا خالة نادية .. الحافة كله مسوّرة .. من سبق لحق؟؟

نادية شجن : عليك ما تستحي يا عبدالقوي يا بن شفيقة شلش .. بز سامانك من تحت بيتي قبل ما أنزل أهبلك حبتين تيكواندو أعدمك العافية .. شوف معي الحزام السوسني ..

عبدالقوي : خليلي حالي يا خالة نادية بروسلي .. جيزي جيز الشعب .. الناس كله ماسكة نورة وتخطط بقع .. بتجي عليا أنا وبتتفلسفي .. أسمعي في ورا بيت نرجس الدلالة بقعة فاضية أحجزلك ؟؟

نادية شجن : أني اللي بنزل أحجزلك بقعة بمجنة القطيع دحين لو ما تتحركش من تحت بيتي يا مكسور الناموس.

عبدالقوي : صدق اللي قال جزاء  المعروف سبعة كفوف.. عادنا أشتي أتجمل معك واحجزلك بقعة .. لا تقعيش هبلة يا خالة نادية ..

نادية شجن : أيش عليك مني .. أني هبله وراضية بنفسي .. زمن أغبر اللي عايش بشرفه يسمونه أهبل ..

عبدالقوي : طيب .. اتلاكعي براحتك .. بس أنا بثبت لك إنك هبله .. فين الناظور حقك ؟

نادية شجن : إندكه .. فوق صدري .. مليانت العين كما السلس الحلبي.

عبدالقوي : هيا شلي لك لفة بالناظور دار مادار على عدن .. كي روحي سنا العقبة..

نادية شجن : أو .. أو .. الناس قدهم يبنو فوق العقبة .. والأمن يحرسهم .. دي لعبة مدبرة لا بعيد..

عبدالقوي : وعادك ماشفتيش حاجة .. إطلعي سنا الفرس ..

نادية شجن : كي باشوف .. أووووووو .. قده قرية فوق جبل الفرس .. حتى خططوا أرضية المعبد وسنا كهوف البوميس.. وربي مباودين .. دي مصيبة كبيرة باتقع فوق ريوسهم وريوسنا..

عبدالقوي  : أيش من مصيبة يا خالة .. الناس تشتي تعيش..

نادية شجن : يا عبدالقوي خلي يجي سيل زي السيل حق 93 وشوف أيش بيقع لهم دونا اللي طلعو الجبال يبنو .. والمصيبة نحنا اللي بنروح فيبه ..  المجاري حق السيلة كله سدونه ولعبو بالدنيا لعب .. وقده بيوتنا كما الويفر من أيام شبكني شبك ولا اترممت .. أقرب سيل بيبزهم وببيبزنحنا معاهم للداهوفة.

عبدالقوي : بس يا شجن .. بطلي المعقلة .. إقتلبتيلي لبيبة .. لو إنتي ماتشتيش تعيشي .. خلي الناس تعيش..

نادية شجن : سكته خلينة أغلق المسح الميداني حقي .. أوووو .. ميدان الهوكي قسمونه بقع .. وأيش دا !! كلية الآداب خططونه .. لاااااا أبو الخضرة قد يخطط الجلي حق بيتي يجعله كسر بيده .. وربي أجت لي السومة ..

عبدالقوي : صدقتي إنك هبله يا خالة نادية .. مش قلتلك من سبق لحق ..

نادية شجن : خلاص دي اليومتين اللي عنده مبدأ ومحترم نفسه قده أهبل !! .. عادنحنا نعايب على الجماعة اللي أجو من برع عدن يبسطو عليها .. رجعنا نحن أهله وناسه كل من قرح معه القات خطط له بقعة وبنى..

عبدالقوي : فرصة والدنيا بلا أمن ولا في حكومة .. الناس تعابا بلا بيوت ودي أرضنا .. نبسط نحنا على الأرض وإلا يبسط عليها الغريب؟ .. خلينحنا نفرض أمر واقع..

نادية شجن : يا قهري عليك يا عدن .. يا حرقة قلبي عليك يا عدن .. سهير يا بنتي حميلي مي مليان دست وطلعيلي الدست وهو يفور ..

عبدالقوي : خير .. أيش بتنجحي يا شجن ؟؟

نادية : با نجح الصلعة حقك يا عبدالقوي .. لو ما تبزش شماطيرك وتتحرك من جنب بيتي باسكب المي وهو يفور فوق راسك لما أجيب أجلك..

عبدالقوي : كدا يا شجن .. تسخيبي؟؟

نادية شجن : أسخيبك ونص .. إنتا سخيت بعدن .. كيف ما تشتينيش أسخيبك !! 

 

يكتبها عمرو جمال

 

 

تعليقات القراء
31687
[1] صدقتي
الأربعاء 25 يناير 2012
ابومحمد الحضرمي | المكلا
من سخى بعدن ينسخى به كل عقاب - الله يلعن كل اثم وغاشم ومحتل

31687
[2] مدير الامن مصيبه المصايب
الأربعاء 25 يناير 2012
قادري | عدن
لاتقلق ياعمرو صحيح هناك مؤامره على عدن ويدبرها مدير الامن وخفافيش الظلام لكن عدن كانت ولازالت طارده لهؤلاء والاقزام سوف يضلون اقزام وانا على ثقه بان عدن سوف تعود كما كانت مدينه المحبه والسلام ومركز اشعاع ثقافي واقتصادي وسياحي والخفافيش سوف تعود الى جحورها

31687
[3] غضب غضب غضب
الأربعاء 25 يناير 2012
العيسائي - أحبك ياعدن | الجنوب الحر الثائر
كيفك ياخالة .. إن شاء تكوني بخير أنت والجيران وعيال الحافة ..... عاده عندي لك خبّاره تشيب بشعر الجاهل،، وتخلي الواحد زي اللي لطمه جني ... تصدقي ياخالة بس الكلام بيني وبينك ولا تقولي لحد علشان ما يضحكوا على الحالة المبعولة اللي وصلنا له... يعني سر بيني وبينك و لاحد يدريبه خاصة اصحابنا اصحاب عدن الغد ... بالصراحة هم طيبين بس دايماً يفلتوا الكلام ولا يخبوا كلمة بحلقهم ..... ياخالة في حافة من الحوافي حقنا بعدن جنب مقهاية السكران (( الله يرحمه عمي علي السكران ))في هناك يبنوا عمارة جديدة بحافة الشيخ عبدالله ...... بس والله مستحي يا خاله ايش أقل لك لا فين وصلت الناس ماعد في حياء ولا احترام لنوفسهم ولا للجيران ... يعني اللي يشتري أرض ويبني له بيت من فلوسه الحلال هو حر وماحد يتدخل به.. الله يبارك له ويزيده ... بس يا خالة الرسول وصى على سابع جار وبعدين يا غريب قع أديب على الاقل في البداية .... تعال ابني و لا في حاجة عاد نحن بانوقف معاك ونرحب بك مثلما من زمان هذا طبعنا وما تغير ولا بايتغير إن شاء الله ..... المهم ياخالةالرجّال أشترى ارضية او على قولت دلحين بقعه بالحافة .. المهم البقعه صغيرة وهو يشتي يبني ويخلي العمارة من قدام كبيرة ... تصايحوا هو جيرانه وهات لك ياشرطه اجالكم الخير ... طالعين نازلين للشوكي دار .... والجماعة حق الشرطة زي مقص المحلوي او زي المقص حق أبو التمباك اللي بالزعفران ... هات لك ياقطع أرزاق حق تعبهم هههههههه المهم تصدقي يا خالة على ايش اتفقوا ومن اللي توسط بينهم مسؤؤؤل كبيييييير في عدن ..... امانه عليك اتحداك تعرفي على ايش اتفقوا ... وخليها محزاية لاصحاب الحافة واتحدى واحد منهم يعرف ههههههه تعرفي على إيش أتفقوا..... زي ماقلت لك لا تكلمي ولا واحد .... الجماعة أتفقوا وقالوا لصاحب العمارة اللي بايبنى البيت قالوا خلاص خلي باب العمارة من وراء ؟!! كيف يعني من وراء ههههههههههههه قالوا له خذ لك الجلـي حق الحافة وخليه مدخل للعمارة واللي يشتي يدخل للعمارة يدخل من الجلي ههههههههه.. اوف رمه ترمهم ... ومن صدق اتفقوا ؟؟؟!!!!!!!!!!! الان العمارة تبتني في الحافة وروحي انتي وعيال الحافة شوفيها العمارة عند أبو الفل صدام اللي يجلس بالزعط عند ريمي ابو البطاط وهناك أسالي على عمارة تنبي بدون باب من قدام ولا من الجنب، الباب من وراء.... يذكرني بالباص المجري (( المكينة وراء هههههه ))، بصراحة انا ما اعرف الرجال صاحب العمارة ولا اعرف طبعه، بس اعرف مليون في المية ان العمارة تنبني وبابه من الجلي ..... يعني فكرة جديدة اللي يشتي يفتح محل صغير في الحافة بسرعة يروح يسد (( يقفل باب العمارة اللي من قدام ويحوله محل )) ويدور ويلحق الجلي حقهم ويسوي له باب من وراء واللي يسبق له الجلي كله بس بشرط يسوي بلاط .... والله يعينه من الكداديف والرمم الي باتجي للي يمشي بالجلي ............. لا يكون هذا التصميم عالمي جديد ونحن ماندريش ... بالله عليك اسألي عيال الحافة اللي ذحلين عايشين في لندن يمكن هناك قلبوا الجلالي ممرات وزعاطيط وخلو باب العماير من وراء ... احسن بذل ما نضحك عليهم ونطلع في الاخير نحن اللي متخلفين و ماندريش بالتطور ....... وردِّي لي خبر، امانتك ياخاله ..... زي ماقلت لك العنوان بسيط حتى الاعمى بايعرفه .... وعلشان ماتضيعي، لإنك احياناً شوفك تجي مهروله، أسألي فين مسجد بن علوان اللي قدام دكان القربي حق النظارات وأبو الحلاوه الصوري .... الله يسامحك ياخالة، خورتينا للحلاوه الصوري ..... يالله مع السلامه ياخاله بس الله الله بالجواب ، علشان في جلي جنبنا بالطويلة محسنه البسس والفيران تلعب به، وعين بدات تزرقه زرق... بخاطرك ياخالة

31687
[4] كلام من ؟؟؟؟؟؟؟
الأربعاء 25 يناير 2012
عضو منظمة منا ضلي الثوره اليمنيه والدفاع عن الوحده |
كلام من حارة الخساف او حارة الشيخ اسحاق ؟؟؟ في عهد الاستعمار والصومل

31687
[5] ياقهري على عدن
الأربعاء 25 يناير 2012
أم صفاء | عدن
ياقهري قهراه عليك ياعدن الله يأخذ اللي كان السبب ولكن الفرج قريب إنشأالله.............ومايبقى على حاله إلا الله

31687
[6] الله يستر
الأربعاء 25 يناير 2012
العدنية المقهورة | عدن
ياناس فرصة اخرج اللي بقلبي لنادية شجن مش مصيبتنا هذي بدأت من يوم ماشفنا صور الدحابشة حتى اخلاقنا تغيرت الله يستر بس علينا ويخارجنا منهم اولا وبعدين بيرجع كل شي زي ماكان بإذن الله ...........صراحة ماشفتش اني وحدة بالغصب الا مع دول الحمير..حبني بالغصب...على قول الحمار اللي قال الوحدة والا الموت ...يجعل له موت حيث ماهووكل اللي يوافقه على هذا الشعار السخيف واللي ابعد من نخرهم كلهم إنشألله..وطلبي من نادية شجن تتكلم على الجواري المرصرصة بكل حوافي عدن واللي عددها استوى اكثر من عدد الجنوبيين ...ولافين هذا كله لافين؟؟؟؟؟؟؟؟؟؟؟؟الله يستر علينا منهم.

31687
[7] خـــــطــــــيــــررر يـــاااالـــعـــيــــســـاااائـــــي
الأربعاء 25 يناير 2012
يااافعيهٌ | الجنوووب
مــآشـــــــااااء عليك يالعيسائي خطيــــرررر خبابير عدنيه طازجه ضيعت خااااله ناديه شجن كلااام عدني قح يدل على عدنيتك وانتماءك وحبك لعدن ونحن جميعآ كذلك ومن قرح يقرح من الحااااقدين على ابناء المحافظات الجنوبيه الذي يبثون سمومهم وحقدهم في المواقع لمجرد ان يروا تعليق يحمل اسم يافعي او ضالعي او ابيني او شبواني وبالذات اسم ياااافعي يصيبهم بهستيريا ويفقدهم صوابهم فينكرون علينا انتماءنا ووطنيتنا وحبنا لعدن ---استمر ياالعيسااائي ياابن عدن الحر الابي ونااافس خاله شجن بالخبابيررر الطازززجه الخطيررره ---وغضب غضب غضب وثــوررره ثـــــوررره يـاااجـنـوووب --وبرع برع برع يـاااستــعـمـاررر

31687
[8] للمعلق 3
الخميس 26 يناير 2012
قادري | عدن
بصراحه ياعم دوشتنا وماعرفت من فين اجي ساعه تقول جنب مقهى سكران وساعه جنب ابوالفل وبعدين قفزت الى مطعم ريمي وبعدين القربي شارع الشيخ عبدالله تاني ومسجد بن علوان في شارع تاني دوختنا سبع دوخات ونسيت اشتري الروتي من الاغبري

31687
[9] غضب غضب غضب
الخميس 26 يناير 2012
العيسائي - أحبك ياعدن | الجنوب الحر الثائر
ياقادي كيف حالك .... شوفنا عادنا ذلحين صحيت من النوم الدنيا فجر وانت باتشوف الساعة كم ذلحين .... يعني خليك المصابحة من الصبح ههههههه الناس تقول يافتاح ياعليم يارزاق ياكريم وأنت بكرت تزنقل علي .... أسمع لايكون أنت شغال ومعاك تاكسي وتشتي تكبر الخبر والمشوار علشان المشقاية حق التاكسي تكثر وكمان عذرك البترول معدوم وغالي هههههههه يالله بطل دحبشة وزنقلة من الصبح ..... المهم ياصاحبي أنا عارف أنك تعرف عدن أحسن مني زغط زغط بس تشتي توضح العنوان للتانيين، او يمكن زيما يقولوا أضرب الجمل يفهم الجمال ... ولا تزعل خاطرك مقهاية السكران بشارع الشيخ عبدالله وصدام أبو الفل كل الناس تعرفه وخاصه الحريم لإنه بصراحه الفل حقه مليح من حق لحج مش من حق الحديدة وحق لحج يفوح ويهبّل مش عنصرية و إلا مناطقية خاصة أصحاب الحديدة طيبيين،هذي حاجة معروفة المهم نرجع لموضوعنا... الفرشة حق الفل بالحافة كمان والعبارة تنبني بين مقهاية السكران والفرشة حق الفل حق صدام أبو الفل ..... والجلي اللي كلمتك عليه ((( بس قل لي أنت كيف عرفت هذي الهدرة وأنا زكنت على خالتي نادية شجن ما تقل هذي الخبارة لحد خاصة أصحابنا اصحاب عدن الغد؟؟!!!))) المهم ياحبيبي ويا حبة عيني الجلي بين شارع الشيخ عبدالله ومسجد بن علوان ... وشارع الشيخ عبدالله بعده شارع الزعفران يعني ابو الحلاوه الصوري ومحل القربي (( حق عمي محمد القربي رحمة الله عليه))مقابل له .... بس أنت أسأل اي واحد وقت الصلاة في المسجد وبايوروا لك ..... بس أخاف يقولوا عليك غشيم كيف من عيال هدن وما تعرف هههههه وإذا مكانك مضيع روح اسأل عمي علي أفندي صاحب المخبازة اللي في الزعفران ويوسه على راسه، و إلا اسأل الصومالي صاحب الشمـّة اللي بجنب فرم الأغيري (( رحمة الله على عمي عبدالغزيز الاغبري )) او أسأل العيال اللي جالسين يشتروا الزردة الله يهديهم من محل التمبل اللي بجنب ابو الليم بالزعفران ... وإذا ماعرفت شوف واحد ثاني يشرح لك ويجيب لك خريطة احسن ... علشان انا كنت عاجز في مادة الجغرافية هههههههههههه وبطل مصابحة والحق الخمير في مقهاية السكران، بعد ماتصلي الفجر في مسجد الشيخ عبدالله هههههههههههه دوخت بك صح اولا ...... والله ياقادري تذكرني بصديق أسمه القادري من عيال الخساف لاتكون انت او يمكن أنت من عيال القادري اللي في شارع الملك سليمان قدام المتحف هههههههههههههههه ألحق الروتي احسن لك بالهناء والشفاء وسلم لي وبوس عدن كله حافة حافة وزعط زعط وحتى جلي جلي .... هذي إسمه عدن قلبي وقرة عيني وحياتي... ياقهري عليك ياعدن ..... بس مافي خوف مادام في رجال وحريم مثل خالتي شجن وعيال مثل عيال الحافة باترجع عدن احسن من زمان .. وانت يا يافعية كمان إيش معك تشتي تقرحي فتنة بيني وبيني خالتي حبيبي هههههه واللي يطولوا لسانهم عل عيال عدن والجنوب كله سيبك منهم هذولاك مايعرفو عدن وكيف اصله وفصله وكيف الناس كلهم حبايب وكلهم حلى ودلى وقلوبهم على بعضهم ومانعرف هذيك الهدره حقهم، إذا كان قده رئيسهم الله يزيله من الدنيا يقول علينا صومال وهنود إيش باقي وهو مايسوي ***من حقهم،غشامه وحسد فيبهم مايدروش انه في عندنا بكريتر مدرسه اسمه مدرس الشهيد خالد هندي بالخساف ما عجبهم اسم شهيد وجا لهم جنان لما سمعوا هندي ههههه وغيروا اسم المدرسة وهم مايعرفوا إنه عندنا يعتبر لقب عايلة مش عنصرية هههههه او حتى الصومالي ياليتهم بس يجربوا ياكلوا القوارمه وبايعرفوا وإلا يروحوا السيلة يشوفوا من اللي يبيع القوارمة والدروع الحلى والبخورو يخيط للناس حتى العلم حقنا هم اللي يخيطوه وعاده يزيدوا يقهروهم ويخرجو بالمظاهرات ههههه اصله الحاسد مثل مايقول المثل (( اللي مايعرف الصقر يشويه ))،هذول مننا وفينا وتصاهرنا وما نعرف الخبر هذا حقهم، بس يسألوا نفوسهم هم الوسخيين اللي اجوا ذلحين ليش ماحد يشتيهم هم؟؟؟؟ وسيبك منهم سكهه وربخة من هدرتهم.... والبهذله هذي اللي ذلحين نحن فيبه يمكن ربنا سوى بنا كذا علشان نعرف قيمته عدن الغالية اكثر واكثر وإن شاء الله مع مزيد من الغضب من الناس العقال حقنا باترجع عدن بسرعه المهم قليل غضب غضب غضب غضب غضب غضب

31687
[10] ياجوج وماجوج
الخميس 26 يناير 2012
عاشق دثينه | دثينه
ملا يا خاله وين تشتي شعب ياجوج وماجوج يروح مساكين ارضهم صغيره متوسعمش كلهم اجو عدن يتنسموا شويه من الزحمه اللي هم فيها

31687
[11] ياقهري على عدن
الخميس 26 يناير 2012
بنت الجنوب | دثينه
ياخاله شجن وجعني قلبي من خبابيرك ولافيها شي يفرح ماله متى بتبشرينا عن خروج الدحابشه من ارضنا الله يبزهم وغضب وثوره ياجنوب وبررررررررررع يادحابشه

31687
[12] عدن ياعشق لاينتهي
الخميس 26 يناير 2012
بنت الجنوب | دثينه
عدن ماينخاف عليها مادام فيها ابنائها خاله شجن واليافعيه وعاشق دثينه والعدنيه المقهوره وام صفاءوالقادري وابو محمد الحضرمي والاخ البطل صاحب كلمة غضب غضب غضب العيساااااااااااااااااااااااائي

31687
[13] صح لسانك يالعيسائي
الجمعة 27 يناير 2012
بن علوان الصبيحي | لندن
بصراحه في منتهئ الدقه والله دكرتنا بايام عدن وصيره والمعاشيق وحقات وكمان مقهئ السكران والخمير والشاهي بعد صلاه الفجر بس بصراحه نسيت هريسه الزعفران حق ابو حضرم والا لا يكون قده من الجماعه اياهم رحمه الله علئ ايام عدن الحلوه والقلوب البيضاء الصافيه اخوان لا هدا هندي ولا داك صومالي ولا حضرمي وبدوي ولا غيره كلنا كنا اخوه من ابناء عدن الغاليه لما اجوا الجماعه طهشوا البلاد كلها وزرعوا الحقد والعنصريه فينا وقسمونا وجعلونا قدنا هنود وصومال مع كل حبي لهم فقد درسنا وتعلمنا معهم وكنا نتقاسم لبه الروتي والرز وصانونه الهواء الله علئ صانونه الهواء لما كنا نغمسها مع لبه الروتي او الرزالابيض والله كانت قليله لكنها مشبعه الان النفوس كانت طيبه المهم ما طول عليكم رجاءي خاله ناديه شجن والعيسائي ابن عدن ما تحرمونا من خبابير عدن واهلها وطرائفه

31687
[14] الى العيسائي شجن
الجمعة 27 يناير 2012
قادري | عدن
شوف ياعيسائي تشرح لي عدن فتحه فتحه وانا اصلا ابنها المهم هذامش جلي هذه فتحه وبعدين لي صديق برضه عيسائي عمل في هذه الفتحه مطعم رعب يعني عشان يجدب الزبائن بس رجع بنده بسبب موقعه هدا ادا كان قصدك هذه الفتحه بس هو ماكان عشوائي لانه تحت بيتهم وانت عارف انه يسكن في هده العماره وهدا مايعنيش اني موافق على العشوائيه وبعدين انت من صدقك اروح اسال الوالد علي افندي الرجال خلاص في عالم تاني وتشتينا اساله ولاتشتي تحنبلي مع اصحاب الزرده وناقص تقول اسال صاحب المطبقيه وحكيم صاحب الجيم بس الاخير بطل الجيم من زمان شوف انا بصراحه كنت اروح مخبازه التركي الى تبندت اما علي افندي استحي اروح عنده لانه صاحب ابي اما طبازتك عشان تعرف من انا فيهم طبعا اكيد للاسف مش صديقك الى في الخساف اما عيال القادري في شارع سند مش الملك سليمان هم اتنين طيبين يعملوا في الرنج يعني مش فاضيين للهدره واحد مكانه يعمل في الرنج والتاني راح قريته في رداع رغم اننا نعتز بهم وادا كان قصدك تانيين يمكن انا المقصود وشوف ياعيسائي شجن عدن لما ترجع لنا باننظفها من جديد من هذه العشوائيات وباترجع مناره الجنوب الحبيب غضب غضب غضب غضب غضب

31687
[15] غضب غضب غضب
الجمعة 27 يناير 2012
العيسائي - أحبك ياعدن | الجنوب الحر الثائر
إحترامي وتقديري لعدن الغد ولكل القراء المحبيين لوطننا الجنوبي الغالي وخاصة قرة عيننا عدن .... وعلشان مايزعلوا حبايبي وتاج راسي اصحاب عدن الغد ويقولوا سمحنا له يتفرج قام يرقص هههههه(( على فكره باقول لوجهم،، عدن الغد مش حقهم بس ذي حقنا كلنا)) صح والا لا ياجماعة ... أشكر خالتي نادية شجن و عدن الغد والجميع .... وأشكر كل من حس بالكلام وتجاوب مع خالتي نادية وكل التعليقات دليل على أن عدن وأهلها حاجة ثانية مافيش زيهم في الدنيا،، بس زي ما قلنا إيش عرفهم .. الله يهديهم ... والاحترام للي خلوني اقلب واطعفر ذكريات زمان وذلحين، واللي خلتنا كمان الاقي بعض عيال المدرسة اللي تربوا على حب عدن ... على فكرة ياقادري،حكيم صاحب الجيم زمان وهو حالياً صاحب ماجستير ويشتغل مدرس بكريتر موجود وعمل بعينه عمليه ( نقشة ) قبل أسبوع والا باتسوي نفسك ماتدريش، عيب عليك انا اللي بالغربة أعرف كل خبابير عدن واهله دقيقة بدقيقة وانت ماتدريش .... لما كنا زغار ولما شبينا الاهل والمدرسة والحافة لمونا كيف ماننسي اصحابنا يالله عليك وأمانتك روح زور حكيم اولاً وثانياً روح بوس عمي علي افندي على رأسه وقل له واحد من عيال العيسائي قال أبوسك على رأسه وهو بايعرفني، تدري ليش لانه عادتي لما نزل عدن واروح المخبازة اسلم عليه وابوسه براسه لإن هذا الرجال بنظري معلم من معالم عدن وحبها للجميع... وهو يعرف هذه العادة وقل له بالاماره قبل شهر كنت في عدن وسلمت عليه هههههه وبعدين تعال قل لي ياعري ..... مخبازة التركي مقفله من زمان يمكن انت تأخد الفتة الموز والحلبة والصيد حقك من مكان تاني وتاكله بباب المخبازة المقفله من زمان هههههه وعيال القادري شوفهم كلهم ذلحين بعدن اللي راح رداع وحاول يعيش هناك بعد الوحدة المصيبة شوفه رجع لعدن وباتحصله مخزن بالحافه وأساله ليش رجع .... بالله ياجماعة والله بعضكم ماتبصدقوا لو قلت لكم ليش رجهع من رداع ..... علشان تعرفوا من هي عدن والعيال اللي تربوا تربيةعدن من حق وحقيق مايقدروا يعيشوا الا فيبه مثل الصيد لو خرج من البحر يموت وما يقدروا يغيروا طبايعهم الحلى ... تعرفوا ليش رجع ههههههه في عندهم برداع مشاكل حصلت وقتل وثأر ... يعني من لاقى صاحبه يحنجل له وصاحبنا قال إيش دخلي انا بالثار وبالفوضى حقهم (( الله يعينهم أبناء الجمهورية العربية اليمنية)) وقال بايطيروا راسي على فاشوس هههه ورجع لعدن هههههه هذا واحد أما الثاني اخوه اللي تعرفه والله ياجماعة لو قصيت لكم باتبكوا بكى على عدن وعيالها الابطال بس اخاف تطول القصة... وهي مهمه مهمه تعرفوا ليش، بإختصار هذا الرجال محترم ويحبوه كل الناس مثل ابوه ((عبدربه الله يرحمه))واللي يحاولوا يفرقوا ويفتنوا بيننا نحن أبناء الجنوب وعيال عدن لما يقولوا هذا هندي وهذا صومالي وهذا كذا وهذا كذاوالله يستاهلوا ضرب بالقراحف .... هذا شوفه ياقادري من الابطال اللي قاوموا الاحتلال في حرب 94 (( رغم ان اصوله شمالية،،، بس إنتمائه وتربيته لعدن وللحق والوطن وحبه للناس الذي تربى بينهم ومعهم وولد فيبه عدن وتزوج وجاب عيال فيبه .. تصدقوا ياجماعه مره انا جالس معه إيش قال لي والعبرة في عينه .... قال لي ياعيسائي انت تعرفنا ونحن جهال وتربينا مع بعض وتعرف كيف حاربنا في 94 ضد الاحتلال..واليوم يجي بعض الناس اللي ما نعرفهم!!! و بعض الجهال يقولوا علينا دحابشة.... فما كان مني الا ان رفعت من معنوياته وطيبت بخاطره، وعندما فارقته جلسب بالسيارة حقي ابكي على نكران وجهل بعض العيال اللي مايفهموا الحقيقة وبسرعه يقرحوا زي الطماش ويعوروا نفوسهم وحبايبهم ..... امانة عليك ياخالة نادية شوفي لنا خبارة على هذا الخبر، لانه انت الناس يحبوك ويسمعوا كلامك ....... ويا قادري روح أسال الاستاذ حكيم وقل له كمان العيسائي يسلم عليك وبانطلع انا وانت اصحاب ومعرفة من زمان جدتي وإذا مش من المدرسة اكيد لما كان جهال برمضان نسوي فرق كبّه او احياناَ عصابات حوافي وكل واحد يسوي لنفسه سيف من خشبة او البيب الكرتون حق البز ونتصارع اكيد فتش براسك باتلاقي خبطه يمكن مني هههههههه الحب كل الحب لمن في قلبه حتى لو ذره حب لعدن (((( بحق كل لقمة خير منك أشبعني ياوطني .... وبحق كل قطرة ماء منك روتني ياوطني ...... عهداً عهداً عهداً لـــن أخـذلك ياوطني )))) ومع مزيد من الغضب أيها الجنوبي الحليم الحكيم ..... غضب غضب غضب غضب غضب غضب غضب غضب غضب غضب ياجنـــوب غضب ..... كلكم تاج على راسي

31687
[16] فيبك طااااااااااااافه للهدره
السبت 28 يناير 2012
قادري | عدن
يعني مكانك تشتي تطلعنا غلطان لو فتحت عيونك باتشوف اني قلت مخبازه التركي الى تبندت والا قلي ماقلتش اما اخونا علي ابن عبدربه الله يرحمه الي طلع رداع قلي اخوه انه طلع من اجل ارضهم لكن شفته قبل يومين مدكي جنب بيتهم مخزن قات وهم من ابناء عدن الي نعتز بهم وكل ابناء عدن الى اصولهم شماليه هم جزء اصيل من هويه عدن وثقافتها وشوف محد بايفرط بهم لكن بصراحه اصحاب الجبهه مانشتيهم دنيا واخره خربو عدن مره ويشتوا يخربوها تاني بس ولايهمك دحين عيوننا مفنجله عليهم ولا طري بايقدر يفتن بيننا هم السوسه وبعدين حملتني امانه السلام لحكيم يعني تشتينا اقول له العيسائي يسلم عليك طيب ولما يقول العيسائي من ايش اقول له انا عن نفسي اسلم عليه دايما لما اشوفه لكن امري له سوف اوصل السلام وانته عدن كلها تسلم عليك وحتى مبانيها بس اشتي اسالك ليش ماسالت على مقهايه سيلان فين ذكرياتك فيها وروادها منيف واخوه مندر وحكيم والعيسائي وشتي اقول لك حاجه ناديه شجن مريضه وتتعالج بمصر طلع به القلب من الى حصل لعدن هههههههههه غضب غضب غضب غضب غضب غضب غضب

31687
[17] غضب غضب غضب
السبت 28 يناير 2012
العيسائي - أحبك ياعدن | الجنوب الحر الثائر
سلامتها خالتنا نادية شجن،، والله قلوبنا معاها هذي اللي قلبها يلف ويضم قلوب الناس كله اللي في عدن، والله اتابع اخباره وأدعوا له بالشفاء،، وعاده صغيره على أمراض القلب، لكن هذي حكمة الله وكل بأجره إن شاء الله او يمكن زي ما قلت وجع قلبه من وجع قلب عدن والجنوب .... والله انه هي والشله اللي معاها رجعوا لنا روح عدن تبض بحب وسلى وتفكير جديد... الله يحفظهم ويصونهم من عيون وحقد اللي ببالنا ..... ولا تنسى تسلم علي علي عبده بسيلان ومكانه مجنون كبـّة او خلاص البرشا شغل باله هههههه ورحمة الله على عمي علي الزغير ويشفي اخونا الشاب اللي كان في غاية الادب والاحترام من المرض النفسي اللي يعانيه ...... وبعدين قلنالك بطل حركاتك وشكلك خطييييييررررررررررررر ، بس أنا من عيال الخساف وباعطيك ردعه تطيربك لافوق القلعة لو ما تطبل حركاتك اللي ببالي هههه بس أنا اعرف كل اصحابك اللي ذكرتهم واللي ما ذكرتهم يعني مش معقول ما اعرفك هههه .... با لنسبه لمنيف انت تعرفه ويقول عليه اصوله شماليه هذاك الدبعي (( تاج راسي )) ويعرفه الجميع،، بس أمانه والله لما شفته يوم الخميس تاريخ 5 يناير وهو في مسيرة الحراك ورافع علمنا الغالي وبقية الاخوان اللي يقولوا عليهم مش معانا ..... واللة اتشبّك راسي وقلنا فعلاً عيال عدن وبناتها صف واحد ويد واحده ولا يغركم ياجماعة اقاويل ذولاك اللي يشتوا يفرقوا بيننا، بس قل له يبطل الزردة ههههه.... وقده فرصه نقول للقيادات اللي برع عدن... روحوا شوفوا عيال عدن وبقية المحافظات كيفهم في المسيرات يد واحدة ...... ليش ما تتعلموا من عيال اليوم وحتى من شيوبة الداخل كيف تجاوزوا مصايبكم ... متى باتتعلموا وتفهموا والا شوفوا احسن لكم .... مثل ما تجاوزوا مصايبكم بايتجاوزوكم انتم كمان .... بس هم طارحين إعتبار للسن حقكم وعلشان ماحد يفرق بينكم،،، وانتوا نصيحة لوجه الله انتبهوا واصحوا قبل ما تنتهي المباراة وانتم برع الميدان تتضاربوا على تذاكر الدرجة اولى وحق المنصة ابو المظلة حق كبار الشخصيات والعجزة .... قلنا لكم الف مرة تعالوا ولكم كرسي الوقار ..... بس كرسي الحكم خلاص خلوه لعيال اليوم واللي يداتهم بيضاء مثل عدن ..... والا بعدين انتم كمان لو ضبحتوا بنا وكترتوا من الخبابير حفكم والمناجمة بينكم و المفاحسة الكذابة يايقع عليكم مننا غضب غضب غضب .... سلامتك ياخالة نادية شجن وسلامة كل قلب ينبض بحب عدن ..... وياقادري بالاقيك قريب إن شاء الله بس مش في المقهاية اولاً شرطي لازم الاقيك في الميدان (( الفرزة )،) ومع الحبايب اللي انا وانت والجميع نعرفهم .... احرار وحرائر الجنوب ..... غضب غضب غضب غضب غضب غضب

31687
[18] شفيق ياراجل
السبت 28 يناير 2012
قادري | عدن
يعني ياعيسائي عرفتهم كلهم وانا الي في الوسط ماعرفتنا وبعدين ايش قلك زينب طيري تروح من زغط الى زغط تسلم على الناس المهم اهلا بك في عدن بس انا من رواد مقهى سكران حتى شله ناديه شجن من رواد المكان لكن انا عشان ماتزعل ازور اصحابك في الميدان واسلم عليهم والحاجه الحلوه فيهم انهم يسكرون ايوه وعلى عين الحاسد .. يسكرون في حب عدن والجنوب

31687
[19] صاحب الجيم
السبت 28 يناير 2012
العقربي | السعوديه
تحيه لجميع الحبايب في كل زغط وحافه . اشوف في هدره كثير هذي الايام على منيف ايش القصه اكيد هدا رايد الطويل مسوي زفه الله يسامحه .

31687
[20] مااااأطيبكم ياعياااال عدن
السبت 28 يناير 2012
يااافعيه | الجنوووب
والله انكم تسلًوا على القلب بخبابيركم وخاصه المناجمه بالكلااام العدني الحلو ربي يحفظكم ويسعد قلوبكم مثل مااسعدوتني واسعدتوا غيررري هكذا هي عدن وهكذا هم رجالها ونساءها قلوبهم صااافيه طاهره لايعرفون الحقد والكراهيه ويصنًون العشره والجميل واخلاااقهم عااااليه ---ربي يشفي خااالتي شجن وترجع لنا بالسلااامه وننتظر خبابيرها على احر من الجمر وننتظر خبابير المنافسيين لها وهم العيساااائي والقااادري والظاهررر انهم جااابوها جووووووول -- ربنا لايحرمنااا منكم جميعآ ولا من مناجمتكم الحلوه --غضب غضب غضب----ثـــوررره ثــوررره يـاااجـنــوووب --برررع برررع يـاااسـتـعـماررر

31687
[21] ولوا كله كلام اما العنصرية فهي الاساس
الأربعاء 01 أبريل 2015
ميمون العدني | الرياض
عجبني كلام العيسائي والعجيب والغريب ان الجميع منافقين وحتى عرب48 كما يسمون واي اسرة لها اصول من الشمال طبيعي بايتم قلعها واعادتها الى منطقتها حتى بيننا اهل دثينة وبيننا وبين يافع والضليعة كله حقد وعنصرية واسفاف وحقارة وعليه اتمنى ان يرجع الانجليز لإدارة عدن مثل السابق اما الحين صدقوني مستحيل يديروها السقالبة والبدو تتباكون على عدن وانتم اكبر شر فيها والايام والسنوات القادمة سوف توريكم ان كلامي صح.



شاركنا بتعليقك

شروط التعليقات
- جميع التعليقات تخضع للتدقيق.
- الرجاء عدم إرسال التعليق أكثر من مرة كي لا يعتبر سبام
- الرجاء معاملة الآخرين باحترام.
- التعليقات التي تحوي تحريضاً على الطوائف ، الاديان أو هجوم شخصي لن يتم نشرها
الأيام
مؤسسة عدن الغد لحقوق الانسان

مؤسسة عدن الغد لحقوق الانسان

الأكثر قراءة
علبة بسكويت ابو ولد تتسبب بمشكلة كبيرة في عدن.. تعرف على القصة
شهود : قوات تابعة للأنتقالي تتجه غرب عدن عقب انتشار قوات يدعمها التحالف بالمنطقة
قوة يرعاها التحالف تبدأ انتشارها غرب عدن
بيــان تحذيـــري صادر عن البنك المركزي اليمني
عاجل : وقف العمل بميناء عدن عقب تعرض عمال لاعتداء من قبل قوة أمنية
مقالات الرأي
عمد مجلس القضاء الأعلى بعدن ( الشرعي ) على اجراء تعيينات قضائية بمخالفة فجة للقانون و دون اتباع أي آلية
لربما ان هناك من يعتقد بأن لسعودية ضالعة في سقوط فرضة نهم والجوف من أجل أن تضغط على قوات الإخوان المتمركزة في
نعمان الحكيم رحمة الله عليك كابتن سعيد دعالة..فقد كتبنا ونبهنا وناشدنا.. لكن لمن.. كلهم موتى..عام مر مذ كتبنا
تلقيت مساء أمس رسالة من مصدر جنوبي موثوق يوضح لي بها سبب عدم حسم الأوضاع في الجنوب، ولم أتفاجئ حقيقةً بما
لم يعد سرّاً الدور القطري - التركي المتعانق مع الدور الإيراني في اليمن هذه الأيام، ونتائج هذا الدور السيئة
لا نريد جنوب على الطريقة العفاشية كالذي نراه اليوم للأسف الشديد ، بل جنوب يسوده العدل والمساواة وسيادة
في زمن الصدق، كنا نحتاج يوما نمزح كذبا على بعض في العام، وكانت كذبة أبريل، مزحة نمارسها في كل أول يوم من أبريل
  العم قاسم شيخ جليل ناهز السبعين، بالمسجد الذي لا يبعد سوى عشرات الأمتار عن داره قلبه معلق! يسعى إليه ببطء
مصطفى نعمان نشرت صحيفة الواشنطن بوست صباح اليوم تحليلا بعنوان (فيروس كورونا سيعيد فتح الانقسامات الغاضبة في
  مواليد مدينة عدن ،مديرية كريتر ، حي الطويلة ، ١٠يناير/١٩٨٦ تربى منذ الصغر في تلك الأحياء السكنية للمديرية
-
اتبعنا على فيسبوك